सिन्धुपाल्चोकमा पहिरोमा पुरिएर ज्यान गुमाउने संख्या ३२ पुग्यो

सिन्धुपाल्चोक, १९ साउन । सुनकोशी नदी थुनिने गरी गत शनिबार सिन्धुपाल्चोकको जुरेमा गएको पहिरोमा परी ज्यान गुमाउनेको संख्या अहिलेसम्म ३२ पुगेको छ । डोजर र स्काभेटरले पहिरो हटाउने क्रममा घरको भग्नावशेषमा सोमबार मात्र २३ जनाको शव भेटिएको घटनास्थलमा रहेका सशस्त्र प्रहरीका एसपी लक्ष्मण सिंहले जानकारी दिए ।
पहिरोमा पुरिएर ज्यान गुमाउनेमा एकै परिवारका पाँचदेखि तीन महिने बच्चासमेत छन् । प्रहरीका अनुसार घुस्कुन १ का राजु धामी, उनकी पत्नी, छोरा र दुई छोरीको ज्यान गएको छ । यस्तै माङ्खा १ कि ३० वर्षीया मिठू तिमल्सिना, ९ वर्षका राजीव, ७ वर्षका रञ्जित र तीन महिने बच्चाको शव भेटिएको छ । १४ वर्षकी जया श्रेष्ठ, २० वर्षकी पुनम श्रेष्ठ, ३० वर्षकी सोममाया श्रेष्ठको शव पनि भेटिएको छ । सोममायाको शवसँगै ११ हजार ४०५ रुपैयाँ र तीन तोला सुन भेटिएको छ । उदरपुर घर भएकी ४१ वर्षकी मिठू दनुवारको पनि शव भेटिएको छ । माङ्खा १ कि ३५ वर्षका चन्द्रबहादुर श्रेष्ठ, ४० वर्षका गणेश श्रेष्ठ, ५५ वर्षकी धनमाया श्रेष्ठ, ५१ वर्षका रामबहादुर श्रेष्ठ, ४७ वर्षकी सुशीला श्रेष्ठ र १० वर्षका प्रशान्त श्रेष्ठको सनाखत भएका छ ।