यसरी पो रहेछ कुरा विग्रेको ?
२१ बैशाख, काठमाडौं । बाबुरामकै नेतृत्वमा राष्ट्रिय सहमतिको सरकार बनाउने सहमति गरेर बुधबार साँझ संविधानसभा भवनबाट उज्यालो अनुहार लिएर बाहिरिएका नेताहरुबीच अचानक मनपेट अमिलो हुनेगरि कुरा नमिल्नुका पछाडी एक गोप्य वैठकले भूमिका खेलेको रहस्य खुलेको छ ।
‘बाबुराम भट्टराईलाई राजीनामा नगराई सरकारमा जानु हुँदैन’ भन्दै एमाले, माओवादी र कांग्रेस नेताहरुले गठवन्धन गरेपछि बिहीबार अपरान्ह हुने भनिएको लिखित सम्झौता र मन्त्रीहरुको राजीनामा रोकिएको छ । सहमतिबाट आत्तिएको माओवादीको वैद्य समूह, एमालेको केपी ओली समूह र कांग्रेसको रामचन्द्र पौडेल र रामशरण महतसहितको समूहले सहमति भाँड्न बिहीबार दिनभर कसरत गर्यो ।
स्रोतका अनुसार उनीहरुबीच बुधबार दिउँसो संविधानसभा भवनमै घण्टौंसम्म गोप्य वार्ता भएको थियो । छलफलमा उनीहरुले बाबुराम भट्टराईलाई कुनैपनि हालतमा सहमतीय सरकारको नेतृत्व दिन नहुने भन्दै अबिश्वास प्रस्ताव ल्याएरै भएपनि हटाउनुपर्नेमा एकमत भएका थिए ।
बैठकमा एमालेका ओलीसहित भीम रावल र इश्वर पोखरेल, माओवादीका मोहन वैद्य, बादल र देव गुरुङ तथा कांग्रेसबाट रामचन्द्र पौडेल, अर्जुननरसिंह केसी र रामशरण महत सहभागी थिए । बैठकपछि संबिधानसभा भवन परिसरमा रहेका सञ्चारकर्मीहरुसँग कुरा गर्दै कांग्रेस संसदीय दलका नेता रामचन्द्र पौडेलले भने-’बाबुरामले राजीनामा नदिए बरु अबिश्वास प्रस्ताव ल्याएर हटाउँछौं, तर उनको नेतृत्वमा सरकारमा जान्नौं ।’
उनीहरुकै कारण साँझबाट सुरु भएको कार्यदल बैठक र शीर्ष वैठक पनि कुरा मिल्न सकेको छैन् । बैठकमा सहभागी एक नेताले अनलाइनखबरसँग भने-’हिजो सहमति गर्नेहरुको स्वर मधुरो भएको छ, भाँड्न खोज्नेहरुको स्वर चर्को भएको छ ।’ छलफलमा उनीहरु नै हावी भएका छन् र हिजो भएका सहमतिलाई पुरै उल्टाउने प्रयास गरिरहेका छन् । सोही कारण अपरान्ह बसेको एमाले स्थायी समिति बैठकमा पनि बाबुरामले राजीनामा नदिएसम्म सरकारमा नजाने निर्णय भएको बताइएको छ ।
बुधबार बिहानदेखि प्रचण्ड, कृष्ण सिटौला, माधव नेपाल र बिजयकुमार गच्छदारको कार्यदल सम्झौताको मस्यौदा बनाउन तल्लिन रहेपनि तीनै दलका केही नेताहरुको ध्रुवीकरणका कारण मस्यौदाले समेत अन्तिम रुप लिन सकेको छैन् ।
सहमति खोजिरहेका तीनै दलका नेताहरुले भने बुधबारकै सहमति अनुसार प्रधानमन्त्रीबाहेक अन्य सवै मन्त्रीलाई सामुहिक राजीनामा गराउने र कांग्रेस एमाले सम्मिलित नयाँ मन्त्रिपरिषद् बनाउनुपर्ने प्रस्ताव गरिरहेका छन् । हिजोको सहमति भांडिने अबस्था आएपछि मधेसी मोर्चाका नेताहरुले बरु अबिश्वास प्रस्ताव सामना गर्ने तर प्रधानमन्त्रीले कुनै हालतमा राजीनामा गर्न नहुने अडान लिन थालेका छन् ।
दलहरुबीच संविधानसभा भवन परिसरमा अहिलेपनि सहमतिका लागि छलफल जारी छ । बैठकस्थल बाहिर आएका कांग्रेस वरिष्ठ नेता शेरबहादुर देउवा र माओवादी नेता बर्षमान पुनले सहमतिको दस्तावेज तयार भइरहेको र त्यसलाई अन्तिमरुप दिने प्रयास भइरहेको बताए ।
