कास्की, वैशाख २८ - संयुक्त संघर्ष समितिले जातिय राज्यको विरुद्ध आव्हान गरेको नेपाल बन्दको क्रममा बिहीबार पोखरामा झडप भएको छ । बन्द गराउँदै हिडने र बन्द गर्न नमान्ने बीच भएको झडपका क्रममा दुई जना घाईते भएका छन् । पोखराको छोरेपाटनमा भएको झडपमा घाईत भएको दुई जनाकेा टाउकोमा गम्भीर चोट लागेको प्रहरीले जनाएको छ । घाइतेकेा पहिचान खुलेको छैन
झडपको स्थितिलाई साम्य पार्न घटनास्थलमा प्रहरी परिचालन गरिएको छ । घटनामा संलग्न रहेको भन्दै सात जनालाई नियन्त्रणमा लिइएको जिल्ला प्रहरी प्रमुख एसपी शैलेश थापाले जानकारी दिए ।
उनले अन्य ठाउमा मुठभेड हुन नदिन सुरक्षाकर्मि परिचालन गरिएको जनाएका छन् ।
क्षत्री समाज नेपाल, ब्राहृमण समाज नेपाल, ठकुरी समाज महासंघ नेपाल, नेपाल दशनामी समाज, विभेदमुक्ति प्रगतिशिल समाज, दलित जनजागरण सेवा संघ, खस क्षत्री एकता समाज पिछडा बर्ग महासंघले जातिय राज्यको बिरोधमा आन्दोलित हुर्दै बन्द आव्हान गरेको हो ।
बन्दले उपत्यका सहित मुलुकभरको जनजीवन ठप्प
संयुक्त संघर्ष समितिले जातीय राज्यको बिरोध तथा ब्राम्हण क्षेत्री लगायतको पनि पहिचान हुनुपर्ने लगायतका माग राखेर आव्हान गरेको बन्दका कारण काठमाडौं उपत्यका सहित मुलुकको विभिन्न भागको जनजीवन बिहानैदेखि प्रभावित भएको छ । संघर्ष समितिमा क्षत्री, ब्राहृमण, दसनामी सन्न्यासी, ठकुरी, दलितलगायतका समूदायको प्रतिनिधित्व रहेको छ ।
समाजमा आवद्ध युवाहरु बिहानैदेखि विभिन्न चोक चोकमा उभिएर प्रदर्शन गर्नुका साथै यातायात संचालनमा अवरोध पुर्याएका छन् । प्रहरीले जवरजस्ती सवारी साधन रोक्न खोजेका दर्जनौं व्यक्तिलाई पक्राउ समेत गरेको छ । राजधानीका सडकमा बिहान केही सवारी साधन गुडेपनि ८ बजे पछाडि करिब करिब ठप्प नै देखिएको छ । सर्वसाधारण हिडेर गन्तव्य तर्फ गइरहेको देखिएको छ ।
समाजले नेपाल बन्द आव्हान गरेका कारण मुलुकको अन्य भागमा पनि जनजीवन प्रभावित भएको छ । समाजको बन्दमा जातीय राज्यको बिरोध गर्दै आएका अन्य समूदायको पनि समर्थन देखिएको छ ।
मुस्लिमद्वारा बन्द
लहान । मुस्लिम समूदायको छुट्टै पहिचानसहितको संविधान बन्नुपर्ने माग गर्दै राष्ट्रिय मुस्लिम संघर्ष गठबन्धनले आव्हान गरेको वन्दका कारण आज (विहीबार) सिरहाको जनजीवन प्रभावित भएको छ । बन्दका कारण सिरहाको लहान लगायतका क्षेत्रमा यातायात, बजार, पसल, कलकारखाना बन्द छन् । राष्ट्रिय मुस्लिम संघर्ष गठबन्धनका कार्यकर्ताहरु विहानैदेखि लहानमा यातायात, बजार वन्द गराउन निस्किएका थिए । पूर्व पश्चिम राजमार्ग लगायत सिरहाका सहायक मार्गमा समेत यातायात वन्द छ । एम्वुलेन्स, प्रेसका गाडीलाई भने अवरोध गरेका छैनन । गठवन्धनले शान्तिको बहाली, नया बन्ने संविधानमा मुस्लिम समुदायको हक अधिकार सुनिश्चित गर्नुपर्ने माग गर्दै बैशाख २० गतेदेखि चरणवद्ध संघर्षको कार्यक्रम गर्दै आएका छन् ।
इनरुवा । मुस्लिम संघर्ष गठबन्धनले आहृवान गरेको तराइ बन्दका कारण आज सुनसरीको जनजिवन पुर्ण रुपले प्रभाबित भएको छ । पुर्व पश्चिम लोमार्गको सुनसरी खण्डमा कुनै पनि सवारी साधन चलेका छैनन् । राष्ट्रिय मुस्लिम सघर्ष गठबन्धन समितिले आब्हान गरेका बन्दका कारणरौतहटको जनजीवन प्रभावित भएको छ । बन्दका कारण पुर्वपश्चिम राजमार्गमा कुनै पनि सबारी चलेको छैन ।
एकैदिन तीन संगठनको बन्द
नेपालगञ्ज । बाँके लगायत तराई क्षेत्रमा बिहीवार एकसाथ तीन संगठनले बन्द आव्हान गरेका छन् । संयुक्त संघर्ष समिति, राष्ट्रिय मुस्लिम संघर्ष गठवन्धन र अखण्ड मध्यपश्चिम संघर्ष समितिले समान उद्देश्य राखेर छुट्टाछुट्टै बन्द आव्हान गरेका हुन् । क्षेत्री समाज, ब्राहृमण समाज, ठकुरी समाज, दशनामी समाज, दलित जनजागरण सेवा संघ, विभेद मुक्ति प्रगतिशिल समाज, खस क्षेत्री एकता समाज र पिछडा वर्ग महासंघ सम्मिलित संयुक्त संघर्ष समितिले बिहीवार र शुक्रवार नेपाल वन्द आव्हान गरेको छ ।
दाङ । राष्ट्रिय अखण्डता र जातीय सदभावका लागि संयुक्त संघर्ष समीतीले आह्वान गरेको दुई दिने नेपाल बन्दका कारण आज विहानैदेखि दाङको जनजिवन प्रभावीत भएको छ । संघर्ष समितिमा ब्राम्हण, क्षेत्री लगाएतका बिभिन्न जातिगत संघ संगठनहर समावेश छन् । संयूक्त संघर्ष समितिले आयोजना गरेको दुइदिने नेपाल बन्दले विहीबार पहिलो दिन सिन्धुलीको जनजीवन समेत प्रभावित बनेको छ । धनकुटामा ब्राम्हण क्षेत्री समाज, दशनामी लगायतले आजदेखि गराएको बन्दका कारण जनजीवन प्रभावित बनेको छ । बन्दको प्रभाव पाल्पा,लम्जुङ,कपिलवस्तु,विराटनगर, झापा, चितवन, हेटौडामा पनि परेको छ ।
अखण्ड मध्यपश्चिमको माग
गुलरिया । अखण्ड मध्यपश्चिमको माग गर्दे स्थानियले आहृवान गरेका बन्दले बर्दियाको जनजिवन प्रभावित भएको छ । जातीय राज्य बनाउन पाईदैन, मध्यपश्चिम टुक्राउन पाईदैन,हिमाल,पहाड,तराई हाम्रो साझा अधिकार लगायतका माग राख्दै दुई दिने बन्दको आहृवान गरेका हुन् ।
सुदूरपश्चिममा बन्द यथावत
महेन्द्रनगर । अखण्ड सुदूरपश्चिमको माग गर्दै सुरु भएको आन्दोलन बिहीबार १४ औं दिनपनि जारी छ । आम हड्तालका कारण कैलाली कञ्चनपुर लगायत सुदूरपश्चिमका पहाडी जिल्लाहरुको जनजीवन प्रभावित भएको छ ।
बिहीबार क्षेत्री, ब्राहृमण, ठकुरी लगायतका विभिन्न संघ संस्थाहरुले पनि आन्दोलन सुरु गरेपछि बन्द अझ चर्किएको छ । सरकारले सुदूरपश्चिममा जारी आन्दोलनका छलफल गर्न वार्ता टोली गठन गरेको भएपनि आन्दोलन रोकिएको छैन् । बन्दका कारण लामो समयदेखि यातायात सेवा ठप्प भएपछि सुदूरपश्चिमका पहाडी जिल्लासंगै तराई कैलाली कञ्चनपुरमा पनि दैनिक उपभोग्य बस्तु र औषधीको अभाव भएको छ ।
