कञ्चनपुर/कैलाली, वैशाख ३१ - अविभाजित सुदूरपश्चिम माग गर्दै सुरु आन्दोलनले १७ औं दिन आइतबार पनि सुदूरपश्चिम ठप्प छ । कैलाली र कञ्चनपुरसहित पहाडी जिल्ला पनि बन्दका कारण प्रभावित भएका छन् । डडेलधुरा र डोटीबाहेकका पहाडी जिल्लामा बजार खुले पनि यातायात सुचारु भएको छैन ।
शनिबार भने कञ्चनपुर झलारीको संयुक्त संघर्ष समितिको आह्वानमा महेन्द्रनगरमा जनप्रदर्शन भयो । करिब २ सय ५० मोटरसाइकल, ट्रक ट्याक्टर र बसमा आएका आन्दोलनकारीले अखण्ड सुदूरश्चिमको माग गर्दै प्रदर्शन गरी मदनचोकमा कोणसभा गरे ।
कैलालीमा पनि प्रदर्शन निरन्तर रह्यो । ट्राफिक चौराहाबाट निस्केको जुलुस एलएनचोक पुगेर टुंगिएको थियो । दुवै पक्षका आन्दोलनकारीका कारण शुक्रबार तनावग्रस्त भएको धनगढी शनिबार शान्त रह्यो । थरुहटको पूर्वघोषित कार्यक्रमअनुसार थारू पक्षधर आन्दोलनकारीले शक्ति प्रदर्शन गर्ने क्रममा शुक्रबार दुवै पक्षबीच झडपले धनगढी तनावग्रस्त बनेको थियो । शनिबार थारू पक्षधर आन्दोलनकारी सडकमा नउत्रेपछि तनाव साम्य भएको हो ।
शव फेला पर्यो
कञ्चनपुर र कैलालीको सीमा जोडिएको राजपुर क्षेत्रमा ४५ वर्षीय हरिदत्त भट्टको शव शनिबार बिहान फेला परेको छ ।
कञ्चनपुरको पूर्वी भेगको गाविस रैकवार बिचुवा ९ बस्ने भट्टको शरीरभरि नीलडाम र चोटपटक छ । पोस्टमार्टमका लागि कैलाली प्रहरीले शव सेती अञ्चल अस्पतालमा ल्याएको थियो । परिवारले शव बुझेको छैन । अखण्ड सुदूरपश्चिम आन्दोलन समितिका संयोजक गोपाल देउवाले थरुहट पक्षधरबाट हत्या भएको आरोप लगाए । आन्दोलनकारीले सहिद घोषणाको माग राखेका छन् । जिल्ला प्रहरी उपरीक्षक वसन्त पन्तले भने भट्टको मृत्युको कारण आन्दोलनसँग सम्बन्ध नभएको दाबी गरे ।
घाइते घर फर्के
प्रहरीको कुटपिटबाट घाइते थरुहट तराई पार्टी अध्यक्ष लक्ष्मण थारूलाई उपचारका लागि काठमाडौं लगिने भएको छ । थरुहट तराई पार्टीका सचिव माधव चौधरीका अनुसार अध्यक्ष थारूलाई नेपालगन्जसम्म एम्बुलेन्समा र त्यहाँबाट हेलिकप्टरमा काठमाडौं लग्ने तयारी भएको हो ।
शुक्रबार धनगढीमा आयोजित आमसभा सकेर झडपमा परी घाइते भएका कार्यकर्ता भेट्न सेती अञ्चल अस्पताल गएका बेला अध्यक्ष थारूलाई जिल्ला प्रहरी कार्यालयका प्रहरी निरीक्षक उद्धव भाटले कुटपिट गरेको थरुहट तराई पार्टीले आरोप लगाएको छ । प्रहरीकै कुटाइबाट थारू कल्याणकारिणी सभाका कैलाली जिल्ला सभापति प्रभात चौधरी र एमाले कैलालीका जिल्ला अध्यक्ष होरीलाल चौधरी पनि घाइते
रहेको थरुहट संघर्ष समितिले जनाएको छ । घाइते जनकराज अवस्थी र राजकुमार रानालाई थप उपचारका लागि नेपालगन्ज रिफर गरिएको छ । सेती अञ्चल अस्पतालका इमर्जेन्सी वार्डमा कार्यरत चिकित्सक कृष्ण बोहराले उपचाररत २८ जनामध्ये १० जलाई भर्ना गरिएको र बाँकी १५ जनालाई शनिबार डिस्चार्ज गरेको जनाए ।
बर्दियामा जारी, बाँकेमा स्थगित
गुलरिया- अखण्ड मध्यपश्चिम माग गर्दै संघर्ष समितिले शनिबारदेखि बर्दियामा अनिश्चितकालीन बन्द घोषणा गरेको छ । बाँकेमा भने बन्द स्थगित छ । बर्दियामा शुक्रबार बसेको संघर्ष समिति बैठकले माग पूरा नभएसम्म अनिश्चितकालीन बन्द घोषणा गरेको हो । बन्दका कारण तेस्रो दिन पनि बर्दियाको जनजीवन कष्टकर बन्दै गएको छ । जातीय राज्यका विरुद्ध र अखण्ड मध्यपश्चिमको माग गर्दै जारी आन्दोलन माग पूरा नभएसम्म जारी रहने संघर्ष समितिका दिनेश श्रेष्ठले बताए ।
बन्दले यहाँबाट छुट्ने लामो तथा छोटो दूरीका सवारी साधन चलेका छैनन् । गुलरिया, राजापुर, बासगढी, भुरीगाउँलगायतका बजार, कलकारखाना र वित्तीय संस्था ठप्प छ । बाँकेको कोहलपुर लगायतका बजार पनि शनिबार बन्द रहे ।
यसैगरी थारू संयुक्त संघर्ष समितिले जातीय पहिचानको आधारमा आत्मनिर्णयको अधिकार सहितको माग राख्दै जिल्लामा जनप्रदर्शन गरेका छन् ।
यसैबीच भरतपुरमा संविधानमा थरुहट स्वायत्त प्रदेश घोषणाको माग गर्दै थारू समुदायले शनिबार बृहत् आमसभा गरेका छन् । वीरगन्जमा भने मधेसी जनअधिकार फोरम नेपाल पर्साले शनिबार साँझ निकालेको मसाल जुलुसमा प्रहरीले हस्तक्षेप गरेको छ ।
त्यस्तै वीरगन्जलाई प्रादेशिक राजधानी बनाउन स्थानीय दलले मुख्य भन्सार नाका ठप्प पारेका छन् ।
कान्तिपुर संवाददाता
No comments:
Post a Comment