प्रधानमन्त्रीले सुकुम्बासीलाई भने- 'एनजीओको पछि लाग्नु हुँदैनथ्यो'

काठमाडौं, वैशाख ३१ - प्रधानमन्त्री बाबुराम भट्टराईले सरकारको निर्देशन नमान्न प्रेरित गर्ने संघ संस्थाको पछि लाग्दा सुकुम्बासीलाई समस्या परेको बताएका छन् ।

डोजर लगाएर सुकुम्बासी बस्ती हटाएको साता दिनपछि आइतबार थापाथलीस्थित बागमती नदीमा विचल्लीमा परेका सुकुम्बासी भेट्न गएका प्रधानमन्त्रीले सरकारले वैकल्पिक व्यवस्था गर्ने बताए ।

'एनजीओ, आईएनजीओलगायत संघ संस्थाको गलत आश्वासनमा परेर सरकारको राहत लिन मान्नुभएन,' प्रधानमन्त्रीले भने, 'तर एक दुई दिनमै तपाईंहरुको पुर्नवासको व्यवस्था सरकारले गर्नेछ ।' उनले चोभारस्थित हिमाल सिमेन्ट कारखानाको खाली ठाउँमा अस्थायी बसोबासको व्यवस्था मिलाइने जानकारी दिए ।

प्रधानमन्त्री भट्टराईले बागमती नदी सफा गर्ने दायित्व प्रत्येक नागरिकको भएको उल्लेख गर्दै सहयोग गर्न सुकुम्बासीहरुलाई आग्रह गरे ।

प्रधानमन्त्रीलाईसमेत थाहै नदिई गृहमन्त्री विजयकुमार गच्छदारले सुकुम्बासी बस्ती हटाउन लगाएपछि माओवादी अध्यक्ष पुष्पकमल दाहालले प्रधानमन्त्रीको आलोचना गरेका थिए । माओवादी निकटको उल्लेख्य बसोबास रहेको बस्ती हटाएपछि यसअघि सुकुम्बासीले प्रधानमन्त्री र माओवादीविरुद्ध नाराबाजी गरेका थिए ।