६८ वर्षीय वृद्ध एसएलसी उत्तीर्ण

२५ भदौ, वीरगन्ज । पढाइलाई उमेरले छेक्दैन भन्ने उदाहरणको पात्र बनेका पर्साको दुर्गमबस्ती ठोरीका ६८ वर्षीय आशबहादुर गुरुङ अन्ततः प्रवेशिका परीक्षा उत्तीर्ण हुन सफल भएका छन् ।नेपाल राष्ट्रिय उच्च मावि, ठोरीबाट यस वर्षको प्रवेशिका परीक्षा दिएका ६८ वर्षीय गुरुङलाई अङ्ग्रेजी र गणित विषय लागेकोमा गत साउनमा सम्पन्न भएको पूरक परीक्षामा उनी उत्तीर्ण भएका हुन् । भारतको आछाम राइफलमा काम गरी अवकाश भएपछि आफ्नो जीवनको उत्तरार्द्धमा पढ्न सुरु गरेका उनी एसएलसी परीक्षा उत्तीर्ण भएपछि उत्साहित भएका छन् ।एसएलसी पूरा गर्ने आफ्नो चाहना पूरा भएकाले अब उच्च शिक्षालाई पनि निरन्तरता दिने उनले बताए । नातिनातिनासँगै एसएलसी दिएका गुरुङ विभिन्न सामाजिक क्षेत्रसँग सम्बद्ध संघसंस्थाहरुमा पनि आबद्ध छन् । उनी कक्षा ८ मा भर्ना भएदेखि नै राससले उनको पढाइप्रतिको रुचिको समाचारलाई निरन्तर प्रकाशन गर्दै आएको छ । रासस